အိပ်ခန်းထဲ တယောက်အိပ်လို့
အိမ်ရှေ့ထွက်ကြည့်တော့လည်း အပြင်ကတယောက်
ဒီမျက်နှာပဲ
အပြင်ကပြန်လာလို့
အိမ်ထဲပြေးဝင်ကြည့်တော့လည်း
အနှီးကိုဖြေချဆော့ကစားနေတာ
ဒီမျက်နှာလေးတွေပဲ
အဖေနဲ့အမေ အိမ်ပြန်လာရင်
အိမ်ကို လမ်းပေါ်ကပြန်ကောက်ရမလား
မြစ်ထဲကပြန်ဆယ်ရမလား
ရှေ့တယောက် နောက်တယောက်
မ ရွှေ့သွားတာ
အိမ်ကိုဇောက်ထိုးလုပ်ထားတာ
တွေ့ရမှာပဲ။
ကြည့်စမ်း၊ စာအုပ်တွေ တအုပ်ပြီးတအုပ်
ဆွဲထုတ်လာပြန်ပြီ
အ၀တ်ခြင်းကို တွန်းလှဲပစ်လိုက်ပြန်ပြီ။
ရှေ့တယောက် မတ်တပ်စမ်းနေတုန်း
နောက်တယောက် လမ်းပေါ်ရောက်လာပြီ
အရိုးထဲက အသားထွက်တယ်
(ရပ်ကွက်ကလည်းပြောတယ်)
လှည်းနေလှေအောင်း မြင်းစောင်းမကျန်
ဆွေပြမျိုးပြ
ကမ္ဘာပြ ပြရမှာပဲ။
အရင်တုန်းက သမီးကြီးဟာ
ကျနော်တို့ရဲ့ ကစားစရာ
အခုတော့ ညီမလေးတယောက်
ကစားစရာ ကမ္ဘာတခု သူကောက်ရပြီ
တယောက်ပျော်ရင် တယောက်အော်လို့
ပြတင်းပေါက်ကိုဖွင့်ရင် ပန်းများပွင့်လို့
နေရောင်ခြည် ပန်းသီး လိပ်ပြာ အိပ်မက်
ကမ္ဘာဟာ မှန်မှန်လည်လို့
သမီးပြီးတော့ သမီး
ငါဟာ အရင်းပြန်ရလို့။ ။
စိုင်းဝင်းမြင့် (၂၀၀၆၊ ဇူလိုင်)
Thursday, January 15, 2009
Subscribe to:
Post Comments (Atom)
No comments:
Post a Comment